10 اطعمة يومية لرشاقة وصحة عال العال

الرشاقة تحتاج منا التعود علي نظام غذائي معين,لذلك اخترنا لك سيدتي 10 أطعمة يومية، لو اتعودتي تضيفها لأكلك هتضمني رشاقة وحيوية من غير مجهود.

عصير الجريب فروت 

الجريب فروت من الفواكه اللي تقريبا لا تحتوي على سعرات حرارية، كمان بتساعد على الحرق بشكل أفضل وأسرع، علشان كدة تناول كوب عصير جريب فروت يوميا ممكن يخسسك 2 كيلو في 3 شهور، يعني تقريبا كيلو إلا ربع في الشهر. 

البيض

البيض من الحاجات اللي بتحتوي على نسبة عالية من البروتين وفي نفس الوقت سعراتها الحرارية قليلة جدا، بيضة على الفطار كل يوم مفيدة جدا لرشاقتك، مهما كانت الطريقة اللي بتحبي تاكلي بيها البيض، بس طبعا البيض المسلوق أقل سعرات حرارية ممكنة. 

عصير الجزر

الجزر مش بس بيقوي النظر، الجزر كمان بيحتوي على كمية كبيرة من الفيتامينات، ثمرة جزر واحدة في اليوم ممكن تمدّنا بكمية الفيتامينات المطلوبة لليوم كله، المعلومة الجديدة النهارده إن عصير الجزر كمان بيساعدك على خسارة الوزن، كوب عصير جزر يوميا هيخليكي تخسي ما بين نصف كيلو وكيلو شهريا.

الفلفل الحار

الفلفل الحامي والشطة من الحاجات اللي بتنشط عملية حرق الدهون في الجسم بشكل كبير جدا، لكن خلي بالك، تناول الفلفل الحار والشطة لازم يكون بحساب، لأن الإفراط في تناولها ممكن يسبب أضرار.

الكرنب الأحمر 

كرنب السلطة الأحمر من الخضروات اللي بتحفز الحرق وفي نفس الوقت طعمها مميز ولذيذ، علشان كدة ممكن نضيف الكرنب لطبق السلطة بتاعنا كل يوم للمحافظة على رشاقة أجسامنا.

الطماطم

الطماطم من الحاجات اللي طعمها حلو وأغلبنا بيحبها، بس مش كفاية إننا ناكلها في السلطة، ممكن ناكلها قطع مع أي ساندوتش، ده هيخليكي تحسي بالشبع أكتر ولمدة أطول.

الخل.. صوص السلطة

مين قال إن صوص السلطة دايما مش كويس؟ الخل والليمون كل يوم على طبق السلطة (أي نوع سلطة) بيساعد على الحرق أسرع، ومابيقللش من فايدة المكونات الخضراء في السلطة.

البقوليات

البقوليات عموما وخصوصا الفاصوليا من الحاجات اللي بتساعد على خسارة الوزن جدا، والأشخاص اللي متعودة تاكل فاصوليا كل يوم (في سلطة أو شوربة) بيخسوا أكتر بنسبة 22%.

التفاح 

التفاح من الفواكه المفيدة جدا للصحة العامة، وفيه مثل أمريكي شهير بيقول: "تفاحة كل يوم تبعد عنك الطبيب"، عشان كده لازم نحاول ناكل تفاحة قبل كل وجبة بـ15 دقيقة، ده هيساعد على حرق حوالي 187 سُعر حراري أكتر.

زيت الزيتون

مش هتصدقي طبعا لو قلت لك إن زيت الزيتون ممكن يخسس! لكن الحقيقة إن زيت الزيتون رغم إنه مادة دهنية لكن استخدامه في الأكل بنسبة معقولة بيساعد على زيادة إحساسك بالشبع.



وضع القراءة :
حجم الخط
+
16
-
تباعد السطور
+
2
-