اصنعي بنفسك جميع منتجات الألبان (اللبن الرائب واللبنة وأيضا الجبنة)

0

طريقة عمل اللبن الرائب ، المِش، واللبنة للدهن ،اللبنة الكورات وأيضا الجبنة البلدية. اصنعي بنفسك جميع منتجات الألبان في المنزل,بعيدا عن منتجات الألبان الصناعية ومصادر الحليب المجهولة اليوم بنقدم لكم متابعينا على موقع نمط حياة صحي طريقة الأجداد بصنع الالبان والاجبان اللذيذة المغذية.

المكونات :
6 لتر حليب بقر طازج + علبة لبن زبادي عادي + علبة لبن زبادي شمينت كامل الدسم (6 لتر حليب عليهم 6 ملاعق كبار لبن زبادي).
كمية الحليب حسب الرغبة (كل لتر حليب عليه ملعقة كبيرة لبن زبادي ).
أو 2 لتر حليب بقر طازج .+ باكيت حليب بودرة 800 غرام (حليب الوكالة ) + لتر ونصف ماء .+علبة لبن زبادي (كل لتر حليب عليه ملعقة كبيرة لبن زبادي )
او بكيت حليب بودرة 800 غرام + 3 لتر مية + علبة لبن زبادي (كل لتر حليب عليه ملعقة كبيرة لبن زبادي )

طريقة عمل اللبن الرائب

طبعا لما بشتري حليب البقر الطازج بغليه على طول عشان يتعقم واسيبه يبرد .
الخطوة الأولى عمل اللبن الرايب :
في المساء ادفي كمية الحليب على نار هادئة ونحرك باستمرار واحرك بالمغرفة ارفع وانزل علشان اعمل رغوة ويطلع شكل اللبن حلو لحد ما يسخن بدرجة حرارة 35_40 أو بحسه بالإصبع إذا احتملته عشر ثواني بيكون هيك تمام وهذه الخطوة ضرورية…
بعدين أذوب اللبن الزبادي بشوية من الحليب وأضيفهم على الطنجرة واحركهم مع بعض و اطفي الغاز .
وهو سخن أصبه في مرطبان وأغلقه كويس وألفه بحرام خميل واضعه في مكان دافئ ليلة كاملة لتاني يوم الصبح .
افتح عليه تاني يوم بلاقيه صار لبن رايب جاهز للأكل أو للطبيخ .

طريقة عمل المش

أخذ نصف كمية اللبن الرائب اللي عملته في الخطوة السابقة ونحركه كويس كويس وممكن أزيده شوية مية …المهم يكون مش مرق ولا جامد كتير …وسط و أصبه في مرطبان . وأرش ملح حسب الذوق وأحط عليه رشة من حبة البركة و4 قرون فلفل اخضر مقطع وأسكر عليه واسيبه يوم او يومين بالثلاجة وبعدين بصير جاهز .

طريقة عمل اللبنة للدهن

آخد باقي اللبن الرائب اللي عملته بالخطوة الأولى و بصبه بشاشة نظيفة ويرش عليه ملح وألفه كويس واحطه على مصفاية تحتها طنجرة ونتركها تتصفى يوم كامل من الصبح لحد المسا مع التقليب كل ساعة .آخر النهار بلاقيها صفت كمية من المياه وصارت جامدة بتنفع للدهن وهيك صارت اللبنة جاهزة للدهن واحطها بعلبه بالثلاجه .

طريقة عمل اللبنة الكرات بزيت الزيتون

اذا بدي اللبنة كرات أكمل على الخطوة السابقة و اترك اللبنة بالشاشة تتصفى كمان ليلة كاملة يعني طول النهار وطول الليل لتاني يوم علشان تتصفى أكتر وتجمد اكتر واكتر علشان اعرف أكورها .بعد ما اتصفت كمان ليلة وجمدت وصرت بعرف اكورها نحضر صينية ونضع عليها ورق كلينكس وفوق الكلينكس شاشة نظيفة أرش على اللبنة حبة البركة وأزبط الملح حسب الذوق .أمسح ايديا بشوية زيت زيتون و أكور اللبنة كرات متساوية ونحطها بالصينية واغطيها بشاشة واتركها بالشمس وهي مغطية طول نهار لما تجف من الرطوبة اللي فيها وتتماسك اكثر .أحضر المرطبان ونضع فيه زيت الزيتون و أكور اللبنة كويس كويس ونضعها في الزيت ويغلق المرطبان …طبعا ممكن نخليه برا الثلاجة.وهيك صارت اللبنة الكرات بزيت الزيتون جاهزة ..

طريقة عمل الجبنة

6 لتر حليب بقر طازج.أو 2 لتر حليب بقر طازج مع باكيت حليب بودرة 800 جرام ولتر ونصف ماء .او بكيت حليب بودرة 800 جرام مدوب في 3 لتر ماء .+منفحة الجبنة من الصيدلية (نقط )(راح احطلكم صورتها )
الطريقة :
أدفي كمية الحليب كلها على نار هادئة بنفس الطريقة السابقة احط اصبعي فيه اذا احتملته عشر ثواني بيكون هيك تمام واطفي النار .
أحط المنفحة …كل لتر حليب عليه واحد ملي من المنفحة (ممكن تستخدموا السرنجة تعت الدواء ) انا حطيت 6 نقط . واحركها واغطي الطنجرة ببطانية حوالي ساعة أو أكثر لحد ما تجمد الجبنة ويفصل الحليب .
احضر مصفاة وأحط عليها شاشة نظيفة وأدير الجبنة على الشاشة علشان يتصفى أرش عليها حبة البركة واحركها ونشكلها على شكل مستطيل وهي في الشاشة وأغلقها من جميع الجهات …فوق المصفاة .الآن بدي اكبسها علشان تتصفى كويس وتصير قالب متماسك..
بحط فوقها وهي بالشاشة لوح تقطيع الخضار و أحط عليه ثقل مثلا جالون مية او طنجرة فيها مية علشان تنضغط الجبنة وتنكيس وتصفى من المية الزيادة واتركها ساعتين ثلاثة على هذه الوضعية أو اتركها طول الليل.
بعد ما تتصفى وتنكبس كويس افتح الشاشة ويرش عليها ملح و اقطعها مكعبات … وهيك صارت جاهزة .
بنغلي مية وملح ونسيبهم يبردوا ونحط فلفل اخضر مقطع وبعدين نحط مكعبات الجبنة فيها ونحطها بالثلاجة .
او بدل المية بنحط مصل الحليب اللي اتصفى منها وعليه ملح .
هذه الكمية بتعمل كيلو ونصف جبنة بلدية .طبعا في طرق كتير على النت بيستخدموا الخل الأبيض بدل منفحة الجبنة.نفس الطريقة بتنفع لحليب الغنم .
وصحة وعافية 💚دعواتكم 💚

Leave A Reply

Your email address will not be published.